Dita e sotme ka qenë shumë e ngjeshur për ambasadoren e re të SHBA-së në Tiranë, Yuri Kim.
Si fillim ajo zhvilloi një takim me ministren Elisa Spiropali. Kjo e fundit përmes një postimi në Facebook, theksoi se mbështetja e SHBA-së për institucionet e Drejtësisë së Re sollën efekte pozitive në aplikimin e Anti- KÇK-së.
Më tej ajo u shpreh se rruga përvijuese drejt integrimit në familjen evropiane, ishin piketat që vijëzuan takimin e këndshëm me Ambasadoren Kim.
Gjithashtu edhe deputeti Taulant Balla zhvilloi një takim me ambasadoren e SHBA-së në kryesinë e Kuvendit.
Balla theksoi se bashkëpunimi me SHBA-në është sot në një nivel të shkëlqyer në dobi zhvillimeve demokratike, të forcimit të shtetit ligjor dhe të parimeve të ekonomisë së tregut, në mbështetje të anëtarësimit të Shqipërisë në Bashkimin Evropian, të ruajtjes së stabilitetit, paqes e prosperitetit në rajonin tonë e më gjerë, të luftës kundër terrorizmit.
Ambasadorja Yuri Kim po zhvillon takime me shumicën e politikanëve në vend, pas marrjes zyrtarisht të detyrës, në fund të muajit janar.
