Ambasadori i OSBE-së në Shqipëri, Bernd Borchardt ka zhvilluar një takim me kryetaren në detyrë të Bashkisë së Shkodrës, Voltana Ademi. Mësohet se takimi mes tyre ka zgjatur rreth dy orë.
Borchardt ka zgjedhur të mos japë për gazetarët asnjë prononcim rreth asaj se çfarë ata mund të kenë diskutuar. Mirëpo, ai është pyetur nëse zgjedhjet vendore të 30 qershorit kanë qenë pjesë e tryezës së diskutimit. Kryediplomati nuk është zgjeruar shumë në dhënien e përgjigjes, duke thënë thjesht “natyrisht qe po”.
Ndërkohë, kryebashkiakja Ademi ka reaguar përmes një postimi në “Facebook”, ku ka theksuar se me ambasadorin diskutuan mbi aktualitetin politik në vend, problematikat e gjetjet e raportit paraprak të OSBE/ODIHR për procesin e 30 qershorit, kërkesën e paraqitur në Gjykatë Kushtetuese nga Shoqata e Bashkive të Shqipërisë, si dhe për situatën që ka pasuar votimin e 30 qershorit.
Reagimi i plotë:
Kryetarja e Bashkisë së Shkodrës zj. Voltana Ademi, ka pritur në një takim ambasadorin e Prezencës së OSBE-së në Tiranë z. Bernd Borchardt.
Gjatë takimit që zgjati rreth 2 orë, janë diskutuar tema të aktualitetit politik në vend, problematikat e gjetjet e raportit paraprak te OSBE/ODIHR për procesin e 30 qershorit, kerkesa e paraqitur ne Gjykatë Kushtetuese nga Shoqata e Bashkive të Shqipërisë si dhe për situatën që ka pasuar votimin e 30 qershorit.
Në kuadër të projektit të bashkëpunimit, Prezenca e OSBE-së në Tiranë, ka përzgjedhur Bashkinë e Shkodrës ndër 61 bashkitë në vend për për një projekt të ri për mbështetjen e qëndrueshmërisë të administratës publike, Kryebashkiakja Ademi shprehu gatishmërinë personale dhe të administratës së Bashkisë se Shkodres për të qenë pjesë e këtij projekti me një rëndësi të veçantë, jo vetëm për administratën por edhe zhvillimin e qytetit të Shkodrës.
