Konfirmohet në detyrë prokurorja e Krimeve të Rënda, Doloreza Musabelliu.
Musabelliu, njëkohësisht kandidate për në Prokurorinë e Posaçme, SPAK u përball të hënën me trupën gjykuese të e Komisionit të Pavarur të Kualifikimit për procesin e rivlerësimit për 3 kriteret.
Gjatë kësaj seance ndaj prokurores, KPK evidentoi disa mospërputhje në deklarimet vjetore të pasurive dhe mungesë burimesh financiare, lidhur me krijimin e pasurive të bashkëjetuesit të prokurores.
Gjithashtu u relatua për një raport të dytë të Drejtorisë së Sigurimit të Informacionit të Klasifikuar, DSIK në të cilin aludohej për korrupsion pasiv dhe dekonspirim. KPK konstatoi se çështja ishte ende nën hetim dhe se nuk mund të konkludohet nëse ka pasur dekonspirim.
Musabelliu ka kryer Shkollën e Magjistraturës në vitet 2002-2005 dhe është emëruar më pas prokurore në Prokurorinë e Krimeve të Rënda. Ajo e ushtron funksionin në këtë prokurori prej 14 vitesh.
