Nënkryetari i Partisë Demokratike, Enkelejd Alibeaj, thotë se Edi Rama po mobilizon sërish krimin dhe “non gratat” që të vjedh zgjedhjet e pjesshme vendore të 6 marsit. Alibeaj thotë se PD është e vendosur në betejën kundër kriminelëve dhe korrupsionit, që mbajnë peng të ardhmen e shqiptarëve. Nënkryetari i PD-së nënvizon më tej se populli meriton një qeverisje më të mirë si lokale ashtu edhe qendrore, dhe se do të vazhdojnë betejën kundër kriminelëve dhe korrupsionit që po e mbajnë peng të ardhmen e shqiptarëve.
“Pushteti që vjen nga krimi dhe korrupsioni nuk prodhon asgjë të mirë për shqiptarët, ata po e shohin këtë çdo ditë. Edi Rama është njeriu që përdori bandat kriminale, fondet e rindërtimit nga tërmeti, korrupsionin e inceneratorëve dhe patronazhistët për masakrën elektorale të 25 prillit. Është ai që përzgjodhi dhe kandidoi të dënuar për krime dhe të korruptuar në krye të bashkive të cilët u denoncuan që në fillim nga PD.
Kjo është e qartë si drita e diellit për shqiptarët dhe për këdo se Rama nuk fiton dot pa kriminelët dhe paratë e pista, prandaj ai ka nisur te mobilizojë sërish krimin dhe non-gratat për të vjedhur votat.
Ne do ta vazhdojmë të vendosur betejën tonë kundër kriminelëve dhe korrupsionit që po e mbajnë peng të ardhmen e shqiptarëve. Shqiptarët meritojnë një qeverisje më të mirë si lokale ashtu edhe qendrore”.
