Nënkryetari i Partisë Demokratike, Enkelejd Alibeaj, thotë se Sali Berisha dështoi që bashkë me Edi Ramën të nxjerrë arkivolë nga selia e PD-së. Deputeti demokrat Enkelejd Alibeaj, shprehet me anë të një postimi në rrjetet sociale se ishte shumë e turpshme mënyra se si ish-kryeministri Sali Berisha orkestroi dhunën mbi selinë e PD-së për interesat e tij. personal.
Statusi
Demokratët, shqiptarët dhe bota mbarë e pa se si Sali Berisha orkestroi dhe udhëhoqi një sulm kriminal mbi Partinë Demokratike për ta shndërruar atë në një bunker për hallin e tij personal. Ky sulm i turpshëm do të mbahet mend si dita e tij e fundit në politikë dhe si fillimi i një kapitulli të ri për Partinë Demokratike, të çliruar nga hijet e të shkuarës, nga dhuna dhe mentaliteti komunist!
Policia ka vënë në pranga 34 persona, dhe ka proceduar 18 të tjerë për dhunën tek selia e PD-së. Policia njoftoi se personat e arrestuar akuzohen për “Organizim dhe pjesëmarrja në grumbullime e manifestime të paligjshme”, “Prishja e qetësisë publike”, “Pengimi i qarkullimit të mjeteve të transportit”, “Shkatërrimi i pronës” si dhe “Prodhimi, mbajtja, blerja apo shitja pa leje e armëve të ftohta”.
Të shtunën, ish-kryeministri Sali Berisha së bashku me mbështetësit e tij dhe Komisionin e Rithemelimit, sulmuan selinë e Partisë Demokratike me mjete të forta ku përfshiheshin varetë, shkallët, levat, çekiçët, trapanët, me qëllimin e vetëm për të hapur dyert e selisë. Rreth 60 minuta pas tentativave të protestuesve për të uzurpuar në zyrën e kreut demokrat, Basha së bashku me deputetët kërkuan ndihmën e policisë, për t’u mbrojtur nga demokratët e tjerë protestues.
