Pandemia e koronavirusit ka bërë që marrëdhëniet mes SHBA-ve dhe Kinës të tensionohen më shumë, duke ndezur flakët e një tendosje potencialisht të rrezikshme të nacionalizmit.
Kina është kritikuar brenda dhe jashtë vendit për trajtimin e virusit, veçanërisht gjatë shpërthimit fillestar. Kjo ka bërë që Kina të përgjigjet me retorika gjithnjë e më të ashpra, duke theksuar se thjesht “po përgjigjet” ndaj akuzave të rreme, veçanërisht nga SHBA.
Zëdhënësi i Ministrisë së Jashtme kineze, Zhao Lijian tha në muajin mars se virusi mund të ishte sjellë në Kinë nga ushtria amerikane.
Ndërsa disa ditë më vonë erdhi edhe përgjigjja e presidentit Trump, i cili e quajti koronavirusin “virus kinez”, duke ia hedhur fajin Kinës.
Në javët e fundit, administrata Trump ka akuzuar vazhdimisht Kinën për trajtimin e COVID-19, duke vënë në dyshim numrin e saj të vdekjeve dhe duke kritikuar reagimin e saj të hershëm ndaj virusit.
Raportohet se administrata e Trump po harton plane për të ndëshkuar Kinën për pandeminë. Opsionet e hakmarrjes përfshijnë sanksione, anulimin e detyrimeve të borxhit të SHBA dhe hartimin e politikave të reja tregtare.
Sipas mediave ndërkombëtare, Trump dhe disa zyrtarë të administratës janë duke kërkuar aleatë të huaj, për t’u bashkuar në fushatën e presionit kundër Kinës.
