Ministri i Brendshëm, Sandër Lleshaj ka qenë sot pranë lumit Erzen nga ku njoftoi nisjen e një tjetër operacioni kombëtar.
Përmes një postimi në Facebook, Lleshaj thotë se objektivi i këtij operacioni është ndërprerja e të gjitha llojeve dhe “derdhjeve barbare” në lumë. Ministri thekson se lumi duhet mbajtur si një thesar dhe jo si një kanal për ujërat e zeza.
Ai bëri me dije se kësaj përpjekjeje do t’i bashkohet edhe Policia e Shtetit, Inspektorati Kombëtar i Mjedisit dhe Territorit, autoritete vendore, shoqëria civile dhe partnerët ndërkombëtarë.
Postimi i plotë:
Për ta kuptuar mrekullinë e lumenjve që na ka dhuruar Zoti, duhet të shkojmë në burim të tyre.
Ne shkuam lart në mal, në burimin e Erzenit, për të nisur prej aty, përgjatë rrjedhës së tij, një udhëtim drejt grykëderdhjes.
Objektivi është të ndërpresim të gjitha llojet e derdhjeve barbare në lumë, me qëllim që atyre që banojnë në brigjet e tyre t’u rikthejmë lumin dhe të tjerëve t’u japim një model sesi duhet të trajtohet lumi, si thesar dhe jo si kanal ujrash të zeza.
Ministria e Brendshme, Policia e Shtetit, Inspektorati Kombëtar i Mjedisit dhe Territorit, autoritete vendore, shoqëria civile, partnerët ndërkombëtarë e të tjerë do të bashkohen në këtë përpjekje.
Të mbrosh Shqipërinë sot nuk kërkohet të derdhësh gjak për të, por thjesht të mos derdhësh mbetje mbi të. ?????