Kryeministri Edi Rama përgjatë një lidhje direkte në emisionin “Opinion” shpjegoi Aktin Normativ të nxjerrë nga qeveria për të rregulluar raportin e qirave në periudhën Prill, Maj 2020.
Rama sqaroi se qiraja e këtyre dy muajve, e pezulluar për disa kategori të caktuara, do të shlyhet në mënyrë proporcionale nga qiramarrësit, pas 31 Majit, sipas një dakordësie mes qiramarrësit dhe qiradhënësit.
“Të gjithë qiramarrësit individë, që kanë kontratë për banesë, përpara shpalljes së gjendjes së epidemisë dhe që kanë një kontratë pune dhe e kanë pezulluar apo zgjidhur si pasojë e gjendjes së shkaktuar nga COVID -19, nuk do ta paguajnë qiranë për 2 muaj, Prill dhe Maj.
Po kështu edhe qiramarrësit studentë.
Po kështu, të gjithë sipërmarrësit, persona fizikë apo juridikë me të ardhura deri në 14 milion në vit, që kanë kontrata noteriale qiraje përpara epidemisë, nuk do ta paguajnë detyrimin Prill dhe Maj.
Dhe më pas, detyrimi i parapambetur i këtyre dy muajve do të paguhet nga qiramarrësi në mënyrë proporcionale pas 31 Majit 2020, për të shlyer detyrimin deri në fund të kontratës”, deklaroi Rama.
