Një bandë kriminale shqipfolëse është shkatërruar si pasojë e një operacioni të sinkronizuar të forcave të rendit në Belgjikë, Spanjë, Holandë, Gjermani dhe Francë.
Në këtë operacion masiv u përfshinë 600 punonjës policie, ndërsa në pranga ranë 25 persona. Policia belge ka filluar hetimet në lidhje me këtë grup që në vitin 2017, në bashkëpunim me Gardën Civile spanjolle dhe policinë holandeze.
Drogat janë futur kontrabandë nëpër kontejnerë dhe janë shpërndarë në mbarë Evropën me automjete të pajisura me rafte të fshehura në mënyrë të rafinuar.
I njëjti grup dyshohet se ka menaxhuar edhe plantacione kanabisi në Spanjë dhe në Gjermani, ku e kultivon dhe e përhapnin kanabisin, përpara se ta shpërndanin atë për shitjet e mëtejshme në vende të tjera evropiane.
Gjatë arrestimeve janë kontrolluar 30 objekte, ku u gjetën gjashtë plantacione kanabisi, 60.000 Euro si dhe mjete të shumta komunikimi, armë e municione.
