Katër anëtarë të familjes Avdiaj nga Kosova, por me qëndrim në Zvicër, humbën jetën tragjikisht mbrëmjen e 14 janarit, pas një aksidenti në Rrugën e Kombit.
Nga aksidenti i rëndë, shpëtoi vetëm vajza e vogël 3-vjeçare, e cila është në gjendje të rëndë shëndetësore në spitalin e Traumës në Tiranë.
Fatkeqësisht, dy prindërit Blerim dhe Anjeza Avdiaj, vajza e tyre 5 vjeçare Medina dhe nipi i tyre Klejdi Koçi 10 vjeç nuk i mbijetuan plagëve të marra.
Ndërkohë, mediat zviceriane kanë publikuar fotot e pjesëtarëve të familjes që humbën jetën tragjikisht në “Rrugën e Kombit”.
“Një Citroen i bardhë u përplas ballë për ballë një kamioni në një rrugë të lagur. Prindërit dhe dy fëmijët ndërruan jetë në vend. Vetëm vajza e vogël Violeta (3) mbijetoi për mrekulli. Aksidenti ndodhi të enjten në Shqipëri, afër qytetit të vogël në Rreshen”, shkruan Blick.
Parakalimi i gabuar dyshohet se është shkaku aksidentit tragjik me katër viktima nga një familje në Rrugën e Kombit dhe la të plagosur rëndë një 3 vjecare. Drejtuesi i kamionit që u përplas me veturën ka deklaruar se nuk mundi ta shmangë aksidentin, pasi mjeti u doli përpara në mënyrë të befasishme dhe pas kësaj dëshmie është lënë i lire.
