Policia ka arrestuar shtetasin që po drejtonte mjetin që u përplas në aksin e vjetër rrugor Elbasan-Tiranë, duke lënë 2 vajza të vdekura.
Në pranga ka rënë F. SH.,18 vjeç banues në Bërzhitë. I riu akuzohet për veprat penale “Shkelja e rregullave të qarkullimit rrugor “ dhe “Drejtim i mjetit në mënyrë të parregullt”.
Kujtojmë se mbrëmjen e djeshme rreth orës 23.30 në rrugën e vjetër Elbasan-Tiranë, i riu u përfshi në një aksident të rëndë. 18-vjeçari ka humbur kontrollin e mjetit duke dalë nga rruga e më pas është përplasur me një pemë.
Si pasojë e këtij aksidenti humbën jetën shtetaset me iniciale D.T, 17 vjeçe, dhe S.S 17 vjeçe. I arrestuari rezulton se nuk kishte një leje drejtimi të klasit ‘B’, ndërsa rezultoi pozitiv edhe në testin e alkoolit.
Njoftimi i policisë:
Lidhur me aksidentin e ndodhur në aksin e vjetër rrugor Elbasan-Tiranë, ku humbën jetën dy shtetase, në përfundim të veprimeve hetimore nga Seksioni i Hetimit të Aksidenteve Rrugore, në Komisariatin Rajonal të Policisë Rrugore Tirane, u arrestua në flagrancë për veprat penale “Shkelja e rregullave të qarkullimit rrugor “ dhe “Drejtim i mjetit në mënyrë të parregullt”, shtetasi F. SH.,18 vjeç banues në Bërzhitë.
Arrestimi i këtij shtetasi u krye, pasi më datë 09.11.2019, rreth orës 23.30’, në rrugën e vjetër Elbasan-Tiranë, në fshatin Berzhitë, duke drejtuar automjetin tip “Alfa Romeo”, ka humbur kontrollin e mjetit duke dalë nga rruga e më pas është përplasur me një pemë.
Si pasojë e këtij aksidenti kanë humbur jetën shtetaset me inicial D.T, 17 vjeçe, dhe S.S 17 vjeçe, ndërsa kanë mbetur të dëmtuar vetë drejtuesi mjetit dhe dy pasagjerët shtetasit E.A dhe O. M, të cilët ndodhen nen kujdesin mjekesor, jashtë rrezikut për jetën.
Nga verifikimi i dokumentacionit, rezultoi se drejtuesi i mjetit shtetasi F.Sh, drejtonte automjetin i pa pajisur me Leje Drejtimi të grupit “B”.
Drejtuesi i mjetit u verifikua me aparatin alkool testues, ku rezultoi se sasia e alkooli ne frymemarrje ishte 0.17 mg/l.
Materialet i kaluan Prokurorisë për veprime të mëtejshme.