Ish-ministri i Drejtësisë, Ylli Manjani e quan procesin e shkarkimit të presidentit Ilir Meta – politik. Për të cilin tha se u krijua për të shmangur vëmendjen nga zgjedhjet vendore të 30 qershorit, të cilat i cilësoi votime moniste.
Teksa ishte i ftuar në emisionin “Kjo Javë”, Manjani u shpreh se kryeministri Edi Rama nuk e shkarkon dot kreun e shtetit, ndërsa shtoi se ai “e di shumë mirë”.
“Kështu ishte edhe procedura e shkarkimit me gjasme, Edi Rama e di shumë mirë që nuk e shkarkon dot Presidentin. Edhe me 150 vota nuk e shkarkon dot, me këtë Kushtetutë që kemi se ai mund të cojë edhe gaz lotsjellës si te Astiri… kjo është pastaj tjetër histori.
Por po themi që sipas Kushtetutës ai e di, por i duhej të bënte një lojë, të ngarkojë opinionin publik që ububu ca po ndodh. E disa do thonë mirë ia bënë qenit, e disa ‘sa gjynah’. Pra të shmangë vëmendjen kjo ka ndodh dhe e konfirmoi edhe Venecia këtë”, deklaroi Manjani.
Po ashtu, nuk kanë munguar kritikat ndaj qeverisë. Për Manjanin, në thelb ky është një “shtet karagjoz”.
“Ky shteti jonë që kemi bërë të gjithë bashkë, kush më shumë e kush më pak. Pse është karagjoz? Sepse ne kemi sot në inventarin e burimeve njerëzore të jurisprudencës, dy persona të cilët kanë shërbyer në Gjykatën e Strasburgut si gjyqtarë, konkretisht z. Kristaq Traja dhe z.Ledi Bianku.
Të dy kanë shërbyer nga 9 vjet. Sikur gdhe të kishin qenë në jetën e tyre boll që kanë shërbyer për 9 vjet në gjykatën më të madhe të hapësirës evropiane dhe këta duhet të ishin sot në gjykatën Kushtetuese të Republikës, pa konkurs pa vetting pa asgjë”, nënvizoi ish-ministri.
