Sot kanë agravuar përplasjet mes socialistëve të Vlorës. Në kohën kur Këshilli Bashkiak zhvilloi mbledhjen në rrugë, Dritan Leli nuk ka vonuar me një reagim. Këshilltarët e Bashkisë Vlorë kanë zhvilluar sot mbledhjen në ambient të hapur.
Ata miratuan katër pika të rendit të ditës, të cilat lidhen me ndihmën ekonomike dhe miratimin e pagesës për 6 muaj për kopshtet dhe shkollat e fëmijëve nga familjet në nevojë. Në sallën e improvizuar, këshilltarët i miratuan pikat e rendit të ditës.
Dritan Leli ka reaguar me një video, ku ka shpjeguar se anëtarët e Këshillit Bashkiak sërish nuk kanë marrë pjesë në mbledhjen e planifikuar për t’u bërë online.
“Sipas njoftimit që ju kam dërguar, prita të diskutonim sot online mbledhjen e kërkuar, por askush nga këshilltarët nuk u paraqit. Uroj që mbledhjet e Këshillit Bashkiak, sot dhe gjithmonë, të ruajnë seriozitetin institucional dhe protokollar për t’i kursyer qytetit shfaqje të panevojshme”.
