SPAK ka shpallur në kërkim ndërkombëtar Adriatik Llallën. Policia e Tiranës i është përgjigjur me një shkresë zyrtare Prokurorisë së Posaçme kundër Krimit dhe Korrupsionit (SPAK), ku e informon se ish-kryeprokurori Adriatik Llalla nuk është gjetur. Uniformat blu kanë bërë verifikimet me metoda speciale, por nuk e ka gjetur, ndaj dhe i ka kërkuar SPAK të nisë procedurat për ta shpallur Llallën në kërkim ndërkombëtar.
Nga verifikimet e kryera, Llalla rezulton të jetë larguar jashtë vendit pak ditë para shpalljes së vendimit të gjykatës, për ta dënuar atë me dy vite burg dhe për t’i konfiskuar pasurinë.
Llalla u dënua me 2 vite burg nga Gjykata e Apelit, por nuk gjendet nga forcat e rendit. Ditën që u dha vendimi, policia i shkoi në banesë për ta arrestuar, por Llalla nuk ishte aty. Ai u shpall në kërkim kombëtar dhe të gjitha komisariatet u informuan për arrestimin e tij.
Sipas burimeve, policia pas kërkimeve të bëra nuk e ka gjetur dhe prej disa ditësh ka vënë në dijeni SPAK, se nuk ka mundur të bëjë arrestimin e ish-kryeprokurorit. Madje policia nga verifikimet që ka kryer arrin në përfundimin se ai ka dalë jashtë vendit, pasi figuron në sistemin TIMS se ka udhëtuar në Itali para vendimit të gjykatës, dhe nuk rezulton të jetë kthyer në territorin shqiptar.
