Kryetarja e bashkisë së Shkodrës, Voltana Ademi, deklaron se do të vijojë të qëndrojë në krye të postit deri në zhvillimin e zgjedhjeve të reja.
Sipas saj, procesi i 30 qershorit ishte ilegjitim, pasi përfaqësimi i vetëm 6% të zgjedhësve nuk është i mjaftueshëm për përfaqësimin në Këshillin Bashkiak.
“Ushtron funksionin kryetarja e bashkisë së Shkodrës për shkak të funksionit për vetëqeverisjen vendore, deri në momentin që ne të kemi zgjedhje dhe duhet të kemi sa më parë për tu dhënë mundësi qytetarëve që të zgjedhin.
Procesi i 30 qershorit është një proces që tashmë është shpërfaqur ilegjitim. Përfaqësimi i vetëm 6% të zgjedhësve nëse mund të quhet i tillë nuk është i mjaftueshëm për përfaqësimin në një organ vendimmarrës lokal sikurse është Këshilli bashkiak për të gjithë qytetarët e Shkodrës”, deklaroi ajo.
Kujtojmë se Shkodra është e vetmja bashki që përfaqësohet nga një kandidat i Partisë Demokratike. Kjo pasi ish-kryebashkiaku i zgjedhur në 30 qershor, Valdrin Pjetri nuk mundi të marrë detyrën për shkak të problemeve me dekriminalizimin.
