Kryetarja në detyrë e Bashkisë së Shkodrës Voltana Ademi pasditen e sotme ishte e ftuar në emisionin “Kjo javë” në “News 24” prej ku theksoi se të gjithë betejën e saj politike e ka bërë në përputhje të plotë me ligjin. Ademi bëri një deklaratë mjaft të fortë, teksa pohoi se ka marrë kërcënime nga Denar Biba, kryeministri Edi Rama dhe drejtues të Policisë.
Ajo tha se zyrtarë të lartë të mazhorancës kanë hedhur fjalë kërcënuese në drejtim të saj e kryetarëve të bashkive: “Duke qenë kryetare e Shkodrës, do vazhdoj të veproj në emër të legjitimitetit. Nuk është çështje force. Ne do të përdorim instrumente demokratike. Fakti që ne jemi duke iu drejtuar gjykatave, tregon se duam rrugën demokratike. Më kanë shantazhuar Denar Biba, Sandër Lleshi, kryeministri, drejtues të Policisë së Shtetit. Kanë thënë që kryetarët e bashkive të guxojnë të bëjnë këtë e atë. Pushteti lokal në tërësi është i dobët. Pushteti lokal megjithatë ka rëndësinë vet.
Ndërkombëtarët duhet të na japin një drejtim ndryshe. Ne po na shkelet sovraniteti. Sistemi është shkatërruar , është shkatërruar sistemi zgjedhor, parlamenti”.
