Prokuroria ka ndryshuar së fundmi qëndrimin për 7 nga 15 biznesmenët e arrestuar për mashtrim me skemë në TVSH. Nga masa e kërkuar fillimisht “arrest në burg”, prokurorja Elisabeta Imeraj kërkoi në përfundim masën “arrest në burg” me afat 20 ditor për Besnik Pelivani, Ilia Dimo, Paqësor Buzin, Rabi Kurtin, Astrit Lalën dhe Rrapo Bodurin, ndërsa për Shpresa Joanidhi “arrest shtëpie”.
Operacioni u ndërmor më 4 shtator, në kuadër të hetimeve disa mujore nga Sektori i Krimit Ekonomik në Policinë e Shtetit, ku u finalizua me arrestimin e 15 biznesmenëve. Ndërkohë ditën e sotme Policia pohoi se vuri në pranga një tjetër person të dyshuar si pjesë e skemës mashtruese duke e çuar në 16 numrin e të arrestuarve.
Këta biznesmenë dhe administratorë firmash, kryesisht në fushën e ndërtimit, kryenin shitje dhe blerje me fatura fiktive, e më pas rimbursoheshin nga shteti duke shkaktuar një dëm financiar në miliona euro. Prokurorja Elisabeta Imeraj, njëherësh drejtuese e prokurorisë së Tiranës ka ngritur ndaj tyre akuzat e krijimit të skemave mashtruese, falsifikimit të vulave e stampave si edhe fshehjes së të ardhurave.
