Kreu i Partisë Demokratike, Lulzim Basha ka deklaruar në mbledhjen e Këshillit Kombëtar të PD-së se nuk ka asnjë marrëveshje mes tij dhe kryeministrit Edi Rama, për zgjidhjen e krizës.
“Nuk ka asnjë negociatë me Edi Ramën. Nuk ka dhe nuk do të ketë asnjë pazar me Edi Ramën. Nuk ka as ndërmjetës dhe as kanale të fshehta mes meje dhe Edi Ramës”, u shpreh Basha.
Ndërkohë, lideri demokrat theksoi se largimi i kryeministrit Rama dhe dalja para drejtësisë e të gjithë atyre që vodhën votat e shqiptarëve, janë kushte të panegociueshme.
Po ashtu, i ka kërkuar anëtarëve të Këshillit Kombëtar të sqarojnë çdo qytetar që të mos bien pre e propagandës së Ramës.
“Ne nuk dolëm nga Kuvendi për të bërë pazar. Ne nuk bojkotuam zgjedhjet lokale për të bërë pazar. Ne nuk kemi shpallur largimin e Ramës për t’u ulur me të në tavolinë. Do të ishte çmenduri dhe nuk do të sillte asgjë të mirë për vendin”, deklaroi kreu demokrat.
