Fushata elektorale e zgjedhjeve të 25 prillit, rriti tensionet midis partive politike, por jo vetëm. Presidenti i Republikës, Ilir Meta pati një përplasje në distancë me ambasadoren e SHBA-ve në vendin tonë, Yuri Kim.
Kreu i Shtetit e akuzoi live në një emision televiziv ambasadoren, duke thënë se po ndërhyn në punët e brendshme, pasi kjo e fundit i kishte thënë Metës se SHBA di disa gjëra për të.
Por, a është në konflikt ambasadorja Kim me Presidentin Meta? E ftuar në emisionin ”Opinon”, diplomatja amerikane refuzoi t’i përgigjej pyetjes nëse mes Metës dhe SHBA-ve dhe asaj si përfaqësuese, ka një problem konkret.
Ajo deklaroi, se detyra e saj në Shqipëri është që të shprehë qartë qëndrimin e Shteteve të Bashkuara përmes kreut të shtetit, kreut të qeverisë dhe ministrave.
Pjesë nga Intervista
Blendi Fevziu: Ambasadore, ju patët një debat të fortë me Presidentin e Republikës Ilir Meta. Çfarë ndodhi midis jush dhe Presidentit të Republikës?
Ambasadorja Kim: E di që njerëzit duan të shohin pak drama dhe emocione, por ajo që do përsëris është se kur flas, flas në emër të Qeverisë së Shteteve të Bashkuara dhe e bëjmë këtë seriozisht, kur arrijmë një qëndrim dhe detyra ime është të siguroj që qëndrimi ynë është sa më i qartë që mundet. Përpiqemi ta bëjmë këtë shumë të qartë, së pari për Qeverinë Shqiptare dhe e bëjmë këtë nëpërmjet diskutimeve me zyrtarë të lartë, përfshi Kryeministrin, Presidentin, Ministrat dhe përpiqemi ta bëjmë pozicionin e SHBA sa më të qartë që mundet për popullin shqiptar. Këtë do të vazhdoj të bëj.
Blendi Fevziu: Edhe tëeet juaj, që komentonte deklaratën e Presidentit të Republikës, dy ditë përpara zgjedhjeve, ishte zyrtar?
Ambasadorja Kim: Absolutisht.
Blendi Fevziu: Le të themi, diskutuar me Uashingtonin?
Ambasadorja Kim: Absolutisht.
Blendi Fevziu: Jo një deklaratë personale?
Ambasadorja Kim: Sigurisht që jo.
Blendi Fevziu: Por Presidenti ju ka akuzuar se jeni përfshirë në punët e brendshme të Shqipërisë.
Ambasadorja Kim: Mendoj se ka të drejtën të ketë mendimet e tij, por edhe një herë, unë mund vetëm të bëj punën time, e cila është të shpreh pikëpamjet dhe të sqaroj pozicionin e Qeverisë së Shteteve të Bashkuara.
Blendi Fevziu: Ka gjithmonë probleme midis Metës dhe ambasadorëve amerikanë. A ka diçka konkrete midis Shteteve të Bashkuara dhe Presidentit apo janë vetëm probleme të ditës?
Ambasadorja Kim: Nuk do të komentoj për çështje të brendshme.
