Kreu i Partisë Demokratike, Lulzim Basha ka deklaruar se në takimin që ka zhvilluar me presidentin Meta mëngjesin e sotëm, kanë diskutuar në lidhje me zgjedhjet e 13 tetorit, datë kjo e caktuar nga vetë Meta.
Në një prononcim për mediat, Basha u shpreh se opozita e bashkuar e vlerëson shqetësimin e Presidentit dhe bashkohet në betejën për shqiptarët.
“Padyshim që takimi me Metën lidhet me 13 tetorin. Ai mendon se kjo është mundësi për daljen nga kriza. Vlerësoj maksimalisht shqetësimin e Metës dhe i bëra të qartë se opozita e bashkuar janë në këtë betejë për shqiptarët.
Nuk duhet të jemi në betejë për Imer Lalët e shokët e tij, por opozita e gatshme për çdo hap për t’i garantuar shqiptarëve të drejtën e votës, që është dhunuar. Rama nuk i rezistoi dot tubimit për të vjedhur dhe në një proces ku garonte i vetëm. Të ofrojmë një qeveri që i shërben njerëzve”, tha Basha.
