Shumë bujë bëri deklarata e pak muajve më parë e Ministrit të Turizmit, Blendi Klosi, i cili tha se valët e muzikës përhapin koronavirusin. Ai u vu me ‘shpatulla pas murit’ nga qytetarët, të cilët e quanin si një deklaratë qesharake. Klosi tha se valët përhapin virusin, një argument i ri ky, që nuk ishte dëgjuar më parë, por që ministri e tha me siguri, sipas së cilit është e vërtetuar shkencërisht. Klosi u shpreh më tej se muzika nuk mund të vras, por qëndrimi në një ambient të mbyllur dhe kondicionimi rrisin rrezikshmërinë e përhapjes së virusit COVID-19. Duke lënë pas këtë deklaratë që lë shumë për të dëshiruar, një skenë që u komentua gjerësisht sot ishte te spitali COVID-2.
Trupa e Ansamblit të Këngëve dhe Valleve Popullore, suprizoi pacientët e Spitalit COVID 2, nëpërmjet një koncerti në oborr, me repertorin më të zgjedhur të këngëve popullore. Por ajo çfarë u servir në media kishte të bënte me bluzat e bardha që kërcenin në ballkone.
Këngëtarët kanë performuar në oborrin e këtij spitali, dhe muzikës së tyre nuk i kanë rezistuar mjekët, të cilët e kanë shijuar këtë çast. Pas këtyre pamjeve, rrjeti ka shpërthyer në komente tallëse dhe ironie. E po kështu me mjaft skepticizëm janë parë bluzat e bardha, të cilët me një vijë melodike dolën jashtë natyrës së tyre, duke harruar pandeminë.
