Kosova

A do të hyjnë Haradinaj dhe Isa Mustafa në koalicion me Albin Kurtin?


               Publikuar në : 13:39 - 08/10/19 Gentjan Progni

Ramush Haradinaj e ka përjashtuar një koalicion me liderin e Vetëvendosjes duke thënë se do të mbetet në opozitë dhe ka përsëritur se Albin Kurti është mashtrues.

Megjithatë, kreu i AAK’së ka thënë se nuk do të kërkojë rinumërim të votave siç po bëjnë disa parti tjera dhe se për të ky rezultat është i pranueshëm, raportoi Express.

Kreu i Aleancës për Ardhmërinë e Kosovës, Ramush Haradinaj ka folur para gazetarëve për rezultatet e zgjedhjeve të jashtëzakonshme parlamentare. Haradinaj shpreson se me votat me kusht dhe të diasporës, koalicioni AAK-PSD do të marrin rreth 100 mijë vota, derisa ka thënë se krahasuar me zgjedhjet e kaluara partia e tij ka shënuar rritje.

Haradinaj ka thënë se do ta përkrahin Qeverinë e re, por nuk do të bëjnë kompromis për temat në të cilat do të angazhohet kjo parti.

Ndërkohë, lideri i LDK-së Isa Mustafa ka bërë me dije se nuk do të ketë bisedime për bashkëpunim derisa të jenë numëruar të gjitha votat, përfshirë edhe ato me kusht dhe të diasporës.

“Do të bisedojmë pasi të përfundojë numërimi i të gjitha votave. Sepse, vetëm kur të përfundojë numërimi, dihet qartë se kush është i pari, respektivisht mandatari”, tha Mustafa për Express.

Ndërkohë bashkëpunimi i dy partive deri më tani opozitare, LDK-së dhe VV-së, ka filluar rreth dy vite më parë kur koalicioni PANA kishte formuar qeverinë.

Si opozitë, këto dy parti patën tentuar të krijojnë një mocion mosbesimi ndaj Qeverisë Haradinaj, por kjo nuk ndodhi, pasi Haradinaj dha vetë dorëheqje nga posti i kryeministrit.

Sakaq, para zgjedhjeve të tetorit, këto dy parti patën disa përpjekje për të formuar një koalicion parazgjedhor, por këmbëngulja e të dyja partive për postin e Kryeministrit çoi deri në dështimin e një marrëveshjeje parazgjedhore.

Megjithëse dështuan në krijimin e koalicionin parazgjedhor, të dy partitë u zotuan se pas rezultateve të 6 tetorit do të bisedojnë për të krijuar koalicionin paszgjedhor dhe për të formuar qeverinë.

Në një intervistë televizive, kandidatja për kryeministre nga radhët e LDK-së, Vjosa Osmani, pati thënë se partisë që do të dalë e para në zgjedhje do t’i takojë posti i kryeministrit.

“Shumë e thjeshtë, kush i fiton zgjedhjet e fiton pozitën e kryeministrit dhe ne do t’i fitojmë zgjedhjet kështu që natyrisht që edhe ne do ta udhëheqim qeverinë”, deklaroi Vjosa Osmani.

Osmani po ashtu kishte thënë se pas zgjedhjeve mundësia më e madhe për koalicion është me VV-në e Kurtit, ndërkaq ka theksuar herë pas here se me PDK-në e Kadri Veselit nuk do të ketë asnjë diskutim për koalicion.

Kthehu
WhatsApp Denonco ne TT