Kreu i Partisë Demokratike, Lulzim Basha ka thirrur në një takim mesditën e sotme të gjithë kryebashkiakët e djathtë, të cilët bojkotuan zgjedhjet.
Kryebashkiakja e Shkodrës, Voltana Ademi, pas mbledhjes është pyetur nga gazetarët nëse duhet ta lërë postin e kryetares së bashkisë apo jo. Ademi i është shmangur kësaj pyetjeje duke u shprehur se është ende herët për ta diskutuar një çështje të tillë.
“Jemi akoma herët për ta diskutuar këtë. Mendoj që raporti që OSBE/ODIHR është një reflektim për popullin shqiptar. Do të shohim zhvillimet jo vetëm të klasës politike, por edhe të njerëzve. Ajo që u tha të dielën është reagimi më i madh popullor që shqiptarët mund të kenë bërë në historinë e vet.
Situata është shumë e rëndë, e rëndë për të gjithë popullin dhe në këtë kontekst politikisht, por bashkë me gjithë njerëzit do të duhet të reagojmë dhe ta bëjmë të mundur”, tha Voltana Ademi.
