Kryetari i PD-së, Sali Berisha është ngjitur për herë të dytë në podium, pasi u qëllua me grusht nga një person në nisje të mitingut. Ai ka shprehur mirënjohjen ndaj të gjithë qytetarëve të pranishëm. Ndër të tjera foli edhe për samitin, ku tha se është një mbështetje e madhe dhe në veçanti për PD-në, forcën politike që në betejë për vlerat europiane përmbysi diktaturën komuniste në vitin ’90.
“Në këtë shesh, në Shqipëri dhe kudo që jeni, mirënjohjen më të pakufijshme. Në emër tuaj më lejoni t’u uroj me gjithë zemër mirëseardhjen në Tiranë shtetarëve më të lartë të vendeve të BE-së, Parlamentit Europian, Komisionit dhe vendeve fqinje.
Për ne është një rast shumë i veçantë, t’u shprehim atyre mirënjohjen tonë për ndihmën e gjithanshme. Ky Samit është një mbështetje e madhe dhe në veçanti për PD-në, forcën politike që në betejë për vlerat europiane përmbysi diktaturën komuniste në vitin 1990.
Ne jemi fatkeq se sot përfaqësohemi në këtë samit me njeriun që duhet të ishte sot para drejtësisë, dhe jo aty i ulur me ju. Ne ndihemi fatkeq sepse pushteti i atij që na përfaqëson, qëndron mbi krimin elektoral, qëndron mbi drogën dhe korrupsionin”.
