Forcat e policisë janë në gatishmëri, për të garantuar rendin dhe sigurinë, kjo në kuadër të mbajtjes së samitit të Bashkimit Evropian me vendet e Ballkanit Perëndimor. Disa forca të policisë me snajper ndodhen mbi godinën e Universitetit Politeknik të Tiranës, zonë e cila cilësohet brenda perimetrit të sigurisë.
Rreth 1500 efektivë pritet të jenë në terren, ndërsa akse të shumta rrugore do të bllokohen për kalimin e delegacioneve.
Drejtori i Policisë së Shtetit, Muhamet Rrumbullaku, ka inspektuar në terren masat e ndërmarra në kuadër të mbarëvajtjes së samtitit të përbashkët mes liderëve të BE-së dhe atyre të Ballkanit Perëndimor.
Që prej mbrëmjes së kaluar, janë zhvilluar kontrolle për mbarëvajtjen e samitit BE-Ballkani Perëndimor në Tiranë.
Njësia Anti-Eksploziv e Repartit Elitë Renea, në bashkëpunim me Gardën e Republikës bënë kontrolle tē imtësishme brenda perimetrit të ngushtë të sigurisë.
Në këtë samit, do të jenë të pranishëm 27 liderë evropianë, shoqëruar nga delegacionet përkatëse. Krahas samitit, do të zhvillohet një protestë e thirrur nga Partia Demokratike. Kreu i kësaj force politike, Sali Berisha ka thënë se protesta do të mbahet në orën 12:00 para Kryeministrisë.
