Kryeministri Edi Rama nuk ka folur gjatë për akuzat ndaj kreut të grupit socialist, Taulant Balla, i cili thuhet se ka qenë nën përgjim për çështje që lidhen me krimin në Elbasan. Rama tha se duhen fakte për të akuzuar dikë, ndërsa theksoi se ai i beson të vërtetës. I pyetur për akuzat për kryetarin e grupit parlamentar socialist, Taulant Balla, Rama tha se të gjithë ata që akuzojnë, duhet të nxjerrin provat.
“Si mund të ketë një të vërtetë tjetër përveç asaj që bazohet në fakte. Unë i besoj fakteve dhe nuk merrem me spekulime.
I ruhem shumë gjysmë të vërtetave se ato janë gënjeshtrat më të mëdha. Nëse kanë fakte akuzatorët, t’i sjellin sepse ata janë të detyruar që nga koha e Romës.
Unë modestisht i jam vënë në dispozicion së vërtetës. S’ka të vërtetë absolute, por asaj që unë besoj se është e bazuar në fakte”, u shpreh Rama.
