Gazetari Artan Hoxha, ka deklaruar në “ABC Live” se SPAK ka kërkuar një urdhër arresti për një kryebashkiak të lidhur me aferën e Inceneratorëve, por sipas tij, nuk është firmosur nga Gjykata e Posaçme. Hoxha e ka cilësuar këtë si një dështim të SPAK, që solli edhe një shfryrje të hetimeve.
Ai theksoi se urdhër arresti ishte për një Bashki më të vogël se ajo e Tiranës. Prokuroria e Posaçme ka lëshuar 11 masa sigurimi, 5 prej të cilave janë ekzekutuar nga policia. Ndërkohë një prej personave i cili ka një masë sigurimi “arrest me burg” në mungesë nuk është arritur të gjendet. Sa i përket 5 personave të tjerë, nga verifikimet ka rezultuar se janë jashtë vendit. Gazetari Artan Hoxha ka nënvizuar se është një zinxhirë korrupsioni në nivelet më të larta.
“Aktualisht jemi tek Fieri akoma, pra tek inceneratori i dytë. Fieri ka marrë një pagesë për vitin 2022 dhe e ka marrë brenda muajit gusht. Janë paguar 3.1 milion euro për Fierin dhe i kanë marrë paratë”.
“Për Fierin, prokuroria tentoi të bënte një goditje më lart. U tentua lëshimi i një urdhër arresti për një kryetar Bashkie, por nuk u miratua nga Gjykata. Nuk u firmos urdhri i Prokurorit. Por të ishte miratuar, hetimet për incineratorin e Tiranës do merrnin rrjedhje tjetër.
SPAK dështoi me këtë tentativë. 128 milion euro është pagesa për Tiranën. Ndërsa për Fierin nuk u shkua dot më lart me hetimet”, tha Hoxha.
“Që nga 2018 janë paguar 86 milion euro. Kemi dy inceneratorë, por i treti nuk ekziston. Kemi një histori me zhurmë dhe pa një proces gjyqësor”, shtoi Hoxha.
