Gazetari Nikoll Lesi është i mendimit se Erion Veliaj nuk mund të mposhtet nga kandidatët politikë që mund të nxjerr opozita.
Në një intervistë të dhënë për “Euronews Albania”, Lesi vuri në dukje se kryebashkiaku i Tiranës mund të përballohet vetëm nga një kandidat i shoqërisë civile. Në mënyrë figurative, ai tha se çdo kandidat politik që vendoset nga opozita përballë Veliajt, ky i fundit i “bluan e i grin”.
“Berisha tha se kemi fituar me kandidat politikë, pra dha mesazhin se Ilir Alimehmeti nuk do të jetë kandidat në Tiranë. Një si ky që mund të dyzonte pjesën gri të votuesve, por çdo kandidat politik që vendoset nga opozita përballë Veliajt, ky i fundit e bluan e grin komplet absolutisht”, theksoi Lesi.
Sipas tij, kandidatët politikë që janë në Tiranë, Belind Këlliçi, Gert Bogdani dhe Fatbardh Kadilli, Erion Veliaj i mund dhe se mund të përballohet vetëm nga një kandidat nga shoqëria civile.
“Që të tre kandidatët politikë që janë në Tiranë, Erion Veliaj i bluan. Ai mund të përballohet vetëm nga një kandidat nga shoqëria civile. Edhe sikur Berisha me Metën të dalin bashkë në Tiranë, makineria gjigante e Erion Veliajt, e PS-së e Edi Ramës i gëlltit”, tha ai.
