Paraditen e sotme, Luiza Gega është pritur me një ceremoni të organizuar përpara Kryeministrisë. Gjatë ceremonisë, Presidenti i KOKSH Fidel Ylli tha se sportistët janë ambasadorët më të mirë të vendit. Fidel Ylli u shpreh se sporti nuk kërkon lëmoshë, dhe se qeveria duhet që të jetë partnere.
“Kryeministri ka vendosur një standard që kampionë të tillë duhet të mirëpriten gjithmonë në këtë mënyrë. Z. kryeministër kemi nisur një rrugë të përbashkët, duke bërë ligje të mira në Parlament. Sportistët shqiptarë nuk marrin më rrugën e emigrimit për flamuj të tjerë. Luiza është anëtare e Forcave të Armatosura, duhet ta falenderojmë ministrin Peleshi për ndihmë. Ne nuk kërkojmë lëmoshë, ne qeverinë e duam partner. Këto ditë kam parë mediokritete të ndryshme…”, kështu u shpreh Fidel Ylli, ndërsa shtoi: “Jemi një nga tre vendet në botë që kemi shpërblimet elitare”.
Në të njëjtën kohë i bëri thirrje publike kryeministrit Edi Rama: “Nxirri nga errësira kompanitë e basteve që po gëlojnë”.
Në fjalimin e tij në ceremoninë pritëse të Luiza Gregës, Presidenti i KOKSH Fidel Ylli sqaroi përse kampionia e Europës, Luiza Gega u trajnua në pistat e Kenias.
“Kjo arritje nuk është bërë vetëm nga Luiza por edhe nga trajneri i saj Taulanti. Më kanë thënë si ka mundësi që nuk ka pistë në Shqipëri për tu trajnuar Luiza. Luiza u trajnua në pistën e Kenias. Pse atje? Sepse Kenia ka kushte të jashtëzakonshme me lartësi 3 mijë metra dhe shkenca thotë se në rast se ti stërvitesh në lartësi të tilla, trupi prodhon rruaza të bardha që quhen doping artificial”, tha presidenti i KOKSH, Fidel Ylli.
