Deputetja e PD, Grida Duma, ka pohuar se do jetë pjesë e protestës së thirrur nga Sali Berisha më 7 korrik, ndërsa bën thirrje për sa më shumë pjesëmarrje. Sipas saj, protesta do bashkojë demokratët e përçarë.
E pyetur nga gazetarët nëse do të angazhohet për të thirrur njerëz në protestë, Duma tha: “Absolutisht po. Kanë bërë shumë mirë që i kanë përfshirë deputetët kudo. E mira është përveç përfshirjes të kërkonin dhe mendime më tej se sa përfshirja.
Duhet të kuptojmë qartë që grupi parlamentar duhet të ketë prestigjin e të respektohet si i votuar nga demokratët dhe nga shqiptarët.
Si të tillë nuk është vetëm çështje që të jemi në grupe pune, duhet patjetër të konsultohen të gjithë deputetët sa i takon strategjisë që do të ndiqet. Unë jam pro protestave.
Besoj që protesta do bashkojë demokratët, pastaj se çfarë do bëjë hierarkia lart është çështje më e madhe se kaq. Strategjia është të ketë pjesëmarrje së pari. Unë nuk kam qenë në ato takime e grupe, por e di shumë mirë që kontakte me kolegët që janë në grupe do mbajmë patjetër”, u shpreh ajo.
Berisha ka deklaruar më herët se tubimi i 7 korrikut do të udhëhiqet nga fronti opozitar, të cilit do t’i bashkohen edhe partitë e tjera parlamentare dhe jo vetëm.
Rritja e çmimeve dhe vendosja e një regjimi nga kryeministri Rama, sipas Berishës, janë arsye madhore për të protestuar. Interesi kombëtar është një tjetër çështje për të cilën kryedemokrati tha se në 7 korrik shqiptarët duhet të ngrihen kundër qeverisë së Edi Ramës.
