Sonjela Ymerllari, 13-vjeç, e cila vuan nga skolioza dhe 3-vjeçari Enes Myteberi i cili vuan nga Sindrom Gjenetik GRIK2, janë transportuar drejt Turqisë, për t’iu nënshtruar ndërhyrjeve kirurgjikale. Falë kontributit të “Top Channel”, dy rastet e publikuara nga “Fundjavë Ndryshe” morën dritën jeshile, duke u dhënë mundësinë për rikuperim sa më të shpejtë, pasi gjendja e tyre shëndetësore ishte e rënduar.
Enesi do të bëjë një ndërhyrje në kokë, pasi nuk i furnizohet truri mirë me gjak. Ai nuk lëviz dhe po kështu nuk njeh njeri. Djali nga fshati Cangoj, Devoll, rrethi i Korçës, vuan nga Sindrom Gjenetik GRIK2, e ndërsa sëmundja që i ka prekur trurin, e ka bërë 3-vjeçarin të fshijë gjithçka nga kujtesa duke mos njohur familjarët e tij. E ëma e Enesit, e prekur me këtë gjest fisnik që po u ndryshon jetën, thotë se shpresat e fundit i kanë për në Turqi.
“Doja të ishte si fëmijët e tjerë, të më thotë një herë mami. “Top Channel” dhe “Fundjavë Ndryshe”, gjithë shqiptarët që kontribuan, i falenderoj nga shpirti. Ata bënë 1-fish, Zoti u’a ktheftë 100-fish”, është shprehur nëna e Enesit.
E ndërsa Sonjela Ymerllari, nga fshati Alarup i rrethit të Pogradecit, vuan nga skolioza, me ndryshime të funksionit nervor të anësive të sipërme dhe të poshtme. Për fat të keq, sëmundja ka avancur në 95% të saj, duke i prekur çdo organ, e duke i rrezikuar jetën. Nëna e Sonjelës është po me aq ankth për të bijën, e ndërsa nuk kursehet me urimet ndaj kontribuesve.
“Sonjelën e kam çuar deri në klasë të pestë në shkollë. Është 13 vjeç dhe vuan nga skolioza, që i ka deformuar shtyllën kurrizore dhe po i dëmton organet. E mbaj në krahë, meqë është e vogël dhe unë kam edhe pak fuqi. Nuk e di në do t’i falenderoj dot të gjithë ata që e bën të mundur atë që unë lutesha ditë e natë. Më duket sikur i njoh të gjithë, sikur i kam vëllezër e motra”, shprehet nëna e Sonjelës.
