Kryeministri Rama u shpreh i vendosur në konferencën me Presidentin e Këshillit Evropian, Charles Michel, se kemi të drejtë të ndahemi nga Maqedonia nëse Bullgaria vijon të bllokojë. Duket se në të njëjtën linjë qëndron edhe ish-kryeministri Berisha. Në një konferencë për media, ku ka komentuar zhvillimet më të fundit në vend, Berisha bëri thirrje për hapjen e negociatave, ku kërkoi që Shqipëria të ndahet nga Maqedonia e Veriut pasi integrimi është individual.
“Mos hapja e negociatave është një akt me pasoja të rënda, qoftë për vendin, qoftë për rajonin. Pasi, në njërën anë themi se persepektiva është, nga ana tjetër nuk hapen negociatat duke bërë që çdo vit e më tepër zgjerohet mundësia për koncepte të tjera partneriteti. Së dyti, siç theksova, shkaku i vërtetë i mos hapjes së negociatave, nuk është muri bullgar, por muret e krimit, drogës dhe vjedhjeve në Shqipëri.
Integrimi i vendeve është individual. Mua më vjen keq që Maqedonisë nuk iu hapën negociatat tre vite më parë. Maqedonia është më para nesh në standarde. Tani u ka dalë problemi bullgar.
BE ka parimin e mos importimit të problemeve me fqinjët. Shqipëria nuk ka asnjë interes që të jetë bashkë me Maqedoninë, në proceset integruese në BE. Sepse kjo krijon një problem serioz me këta qeveritarë të papërgjegjshëm që ka Ballkani. Sepse këta kanë lidhje me krimin. Dhe rruga e vetme për të ndikuar në standarde dhe kritere është hapja e negociatave, dhe më pas të bëhen hapa sipas performancës”, tha Berisha.
