Kryeministri Edi Rama nuk ka të ndalur, ndërsa ka paralajmëruar kallëzime për kryebashkiakë socialistë, që sipas tij, i ka kapur Njësia Anti-Korrupsion. Nga selia e PS-së, i shoqëruar nga Ministri i Drejtësisë, Ulsi Manja, Rama ka bërë të ditur se Njësia Anti-Korrupsion e qeverisë do të kallëzojë në SPAK kryetarë Bashkie që përfqësojnë Partinë Socialiste. Gjatë fjalës së tij, Rama bëri të ditur se këta kryebashkiakë “kanë turpëruar Partinë Socialiste”, ndërsa theksoi se ata duhet të ishin vënë nën hetim më përpara nga drejtësia.
“Shumë shpejt do ketë kallëzime në SPAK për kryetarë Bashkie të PS-së nga Njësia Anti-Korrupsion. Ne bëjmë punën tonë. Çfarë kallëzimi duhet të bëjmë ne? Njësia Anti korrupsion bën kallëzime në kuadër të veprimtarisë së vetë.
Nuk mund të bëjmë ne kallëzime për politikanët kundërshtarë. I kemi bërë në të kaluarën, por unë kam qenë gjithmonë kundër tyre. Nuk është fare kjo puna jonë”, deklaroi Rama.
Sipas tij; “SPAK të mos gjuajë dinamit për cironka. Kjo ka shumë rëndësi. As të mos bëjë KLSH-në, apo inspektimin financiar të Ministrisë së Financave, sepse janë institucione të ndara.
SPAK duhet të merret me të korruptuarit dhe jo me procedura. Këto nuk janë procedura, nuk kanë nevojë për shumë mund për ti identifikuar si subjekte të SPAK. Është shumë e thjeshtë.
Mendoj se edhe prokurorët që janë në detyrë dhe nuk kanë vepruar dhe kanë lënë të parashkruhen vepra të kësaj natyre, duhen pyetur për këtë gjë. Të kërkosh më shumë nga gjithë ky sistem që e kemi krijuar është detyrim, jo ndërhyrje”.
