Gjykata e Lartë ka refuzuar kërkesën e Adriatik Llallës, për pezullimin e dënimit me 2 vite burg për korrupsion. Ish-kryeprokurori bëri këtë kërkesë me arsyetimin se vuan nga një sëmundje e pashërueshme, dhe se izolimi do i sillte pasoja të rënda për shëndetin.
Avokati i tij Sokol Hazizaj ka deklaruar se “Gjykata e Apelit në Romë ka pranuar faktet e gjendjes së tij shëndetësore të rënduar, dhe ka refuzuar në një farë mënyre kërkesën e autoriteteve shqiptare për ekstradim. Italia e njeh gjendjen shëndetësore të rënduar dhe ka pezulluar ekstradimin. Çuditërisht gjykata shqiptare se njeh”.
Nga ana tjetër, kreu i SPAK, Arben Kraja tha: “Gjendja shëndetësore e Llallës është e njohur, por nuk është shkak për pezullim. Kjo gjendje ka qenë prej kohësh. Ka kryer funksione të larta, dhe nuk është bërë pengesë sëmundja”.
Ish-kryeprokurori iu drejtua përpara disa ditësh me një kërkesë Gjykatës së Lartë, ku i kërkoi pezullimin e dënimit të tij, me argumentin se vuan nga një sëmundje e pashërueshme dhe se izolimi i tij do i sillte pasoja për shëndetin.
Ish-kryeprokurori Llalla, u shpall fajtor për mosdeklarim dhe fshehje pasurie në tre episode. Më konkretisht ai akuzohet se nuk ka deklaruar një shumë prej rreth 7000 dollarë për lindjen e djalit të tij, shpenzimet për ndërtimin e katit të tretë te banesës si dhe shkollimin e vajzës së tij në Gjermani.
Gjithashtu ndaj ish-kryeprokurorit gjykata vendosi edhe konfiskimin e pasurisë. Më konkretisht bëhet fjalë për një apartament në Durrës dhe rreth 22 mijë m2 tokë arë në periferi të Tiranës. Në vendimin e saj, Apeli i GJKKO-së thotë se ish kryeprokurori për 5 vite nuk duhet të ushtrojë asnjë funksion publik.
Ish-kryeprokurori Adriatik Llalla, i arratisur nga vendi para vendimit të formës së prerë që e dënoi me dy vjet burg për “fshehje të pasurisë”, u arrestua në Itali në dhjetor të vitit të kaluar. Llalla ndodhet nën mbikqyrjen e autoriteteve italiane, në pritje të vendimit që do të marrë gjykata pas kërkesës së Shqipërisë për ekstradimin e tij.
