Me anë të një postimi në rrjetet sociale, Kreu i Shtetit, Ilir Meta ka ripërsëritur thirrjen ndaj Kuvendit dhe Qeverisë, “për ndërmarrjen sa më parë të reformave rrënjësore, për ta shëndetësuar arsimin nga fiktiviteti dhe militantizmi partiak”. Në një postim në rrjetet sociale, presidenti ka shkëputur një pjesë nga deklarata e tij në konferencën për mediat ditën e premte.
Dje Meta shprehu kritika ndaj qeverisë socialiste, lidhur me sistemin arsimor në vend, ku shifrat e fundit tregojnë një nivel alarmant të mungesës së arsimimit për një pjesë të mirë të popullsisë si dhe renditjen e ulët të universiteteve shqiptare në botë. Meta theksoi se është e papranueshme që 30% e pjesës aktive të shoqërisë të ketë vetëm arsim të mesëm si dhe 40% e pjesës së popullsisë të grupmoshës 25-39 vjeç të kenë kryer vetëm arsimin fillor.
Meta nënvizoi diferencën e madhe në arsim me BE, ku 81% e popullsisë së Europës së Bashkuar e zotëron të paktën arsimin e mesëm. Për sa i përket rënies në cilësinë e universiteteve të Shqipërisë në renditjen botërore, kreu i shtetit bëri me dije se universitetet tona vuajnë nga mosfinancimi i kërkimit shkencor, ndërtimit të laboratorëve, konkurrencës së dobët me universitetet e huaja në platforma teknologjike dhe projekte zhvillimi. Të gjitha këto sipas Metës, po shkaktojnë “rrjedhjen e trurit” shqiptar në Europë.
Postimi i Presidentit Ilir Meta:
I bëj thirrje Kuvendit dhe Qeverisë për ndërmarrjen sa më parë të reformave rrënjësore për ta shëndetësuar arsimin nga fiktiviteti dhe militantizmi partiak.
Hapjen e sistemit dhe freskimin e tij me prurje cilësore pedagogjike dhe akademike, që do të jenë hartuesit dhe zbatuesit e reformave të vërteta dhe të besueshme, që do ta transformojnë këtë sektor.
Për ta nxjerrë atë nga koma, për ta rigjallëruar dhe futur në binarët konkurrues të tregut europian të dijes dhe të teknologjisë.
Vetëm me një arsim konkurrues dhe cilësor ne do t’u japim të rinjve tanë shpresë dhe siç thoshte Gëte, rrënjë për t’u fiksuar dhe krahë për të fluturuar, por jo jashtë Shqipërisë.
