Themeluesi i Fondacionit “Fundjavë Ndryshe”, Arbër Hajdari, ka përcjellë dy lajme të shumëpritura, sa i takon sugurimit të fondeve të nevojshme për kurimin e dy fëmijëve nga Shkupi dhe Ferizaj.
Ai fillimisht ishte në Shkup, ku njoftoi se janë mbledhur 20 mijë eurot e nevojshme për t’i ardhur në ndihmë Trojanit, i cili ndodhet në gjendje jo të mirë shëndetësore.
“Në Shkup, për ti dorëzuar shumën 20.000 Euro babait të Trojanit. Lotët e babait për të birin i cili ndodhet në spital në gjëndje jo të mirë shëndetësore, prekën zemrat e shqiptarëve!
I urojmë vogëlushit nga Gjakova, të shkuara dhe inshallah bëhet mirë. Ju faleminderit të gjithë bamirësve”, shkruan Arbër Hajdari në rrjetin social Facebook.
Trojan Kojdomqaj, 9-vjeç nga Gjakova vuan nga infeksion sepsta. Djali ndodhet i shtruar në Acibadem Sistina në Shkup, pasi po vijon trajtimin për pastrimin e infeksionit. Djali 9-vjeçar do kryejë disa ndërhyrje të tjera, për të stabilizuar shëndetin e tij.
Drejtori Ekzekutiv i Fondacionit “Fundjavë Ndryshe”, Arbër Hajdari nuk u ndal me kaq, por udhëtoi për në Ferizaj, për t’i kthyer buzëqeshjen një tjetër familje. Bëhet fjalë për 2 vjeçaren Alea Burniku nga Ferizaj. Gjatë lindjes, mjekët i kanë dëmtuar një nerv që prek pleksusin braial. Tashmë vajza do të shkojë në Turqi, për të kryer ndërhyrjen e nevojshme.
“Kam ardhur në Ferizaj për tu takuar me nënën e vogëlushes së sëmurë Aleas dhe për ti dhënë një lajm të mirë. Në më pak se 24 orë, falë kontributin tuaj, është realizuar shuma 20.000 Euro për Alean. Vajza do të trajtohet në Turqi dhe do të kalojë atje një kohë të gjatë. Të shkuara vogëlushe. Faleminderit bamirësve”.
