Dje, në një komunikim online, kryeministri Rama tha se qeveria do të krijojë një bord kombëtar për administrimin e çmimit të karburantit. Brenda kësaj jave, Këshilli i Ministrave do të ketë gati skenarët e përballimit të krizës së çmimeve të energjisë, naftës dhe produkteve të tjera të konsumit. Dy vendimet e fundit, shefi i qeverisë i konfirmoi pasi iu kthye nga Emiratet e Bashkuara dhe në kohën kur u mbajt protesta e dytë qytetare kundër rritjes së çmimit të lëndëve djegëse.
Një ditë pasi njoftoi se qeveria do të ndërhyjë me një akt normativ për administrimin e naftës, kryeministri Rama po zhvillon një takim me furnizuesit e naftës në vend.
Kryeministria – Me furnizuesit e naftës për t’i vënë fre çdo spekullimi me pasojat e luftës në çmimet e karburantit.
Situata e jashtëzakonshme imponon ndërhyrjen e drejtëpërdrejtë të qeverisë për ngrirjen e marzheve të fitimit si edhe transparencën e çmimit, prandaj ngrihet menjëherë Bordi Kombëtar i Administrimit të Karburantit.
Një Akt-Normativ me fuqinë e menjëhershme të ligjit për përballimin e kësaj emergjence, do të përcaktojë që nesër edhe kuadrin e detyrimeve dhe të drejtave të kufizuara të furnizuesve të karburantit, për një afat dymujor të rinovueshëm sipas dinamikës së luftës.
