Një ditë më parë u zbulua tentativa e grabitjes së një banke në bulevardin “Zogu I”. Persona ende të paidentifikuar gërmuan disa ditë me radhë, për grabitjen e bankës pranë Ministrisë së Drejtësisë, aty ku u gjet edhe një armë zjarri.
Gazetarja Anila Hoxha, teksa ka qenë e ftuar mëngjesin e sotëm në emisionin “Wake Up”, deklaroi se autorët kishin informacione shumë të sakta.
“Ata kanë pasur informacion shumë të saktë, e dinit ju që kishte tunele poshtë? Ne kur zbritëm; humbëm, pasi tunelet ishin si rrjetë. Duhet të kishe informacion dhe hartë, të dije distancën.
Të dije se ku do dilje, bazuar në këtë informacion, ato dyshohet se mund të kishin edhe informacion. Ata kanë punuar sistematikisht, pas një muri betoni ata nisën gërmimet e më pas fillonin të krijonin qëllimin e tyre.
Nëse ata do ia dilnin mbanë, do të ishte një nga bastisjet më të mëdha, ka pasur dhe një të tillë te 9-katëshet vite më parë dhe dështuan. Këto janë ngjarje që zbulohen ose me informacione shumë të saktë, ose si në këtë rast. Janë ngjarje që janë kopjuar edhe nga jashtë, në Brazil. Aty kanë gjetur prova materiale, s’ka ende të arrestuar. Pretendohet se janë gjetur prova”.
Grabitja ishte planifikuar të kryhej përmes tuneleve të nëndheshme. Kanë qenë pikërisht gërmimet për tunelet e nëndheshme, që kanë tërhequr vëmendjen e banorëve të zonës. Zhurmat nga mjetet e përdorura për të hapur tunelet, kanë bërë që banorët ta denoncojnë rastin në polici.
Pas denoncimit, efektivët kanë filluar hetimet ku është zbuluar dhe tentativa për grabitje. Mbrëmjen e së hënës u raportua se në afërsi të Ministrisë së Drejtësisë ishte gjetur një armë zjarri e llojit pistoletë, dhe më pas se një person i armatosur ishte vënë në pranga. Informacion që me sa duket ka qarkulluar qëllimisht nga policia, për të ruajtur sekretin e operacionit.
