Partia Demokratike ka vendosur të votojë pro shtyrjes së afateve për organet e Vettingut, duke marrë në këmbim plotësimin e dy kushteve kryesore të saj, kryerjen e reformës tërriroriale dhe kryerjen e reformës zgjedhore.
“Sot nisim punën për dy reforma të rëndësishme, dhe që janë prioritet për Shqiperinë dhe demokracinë, prioritete për PD, reformën zgjedhore dhe atë territoriale. Zgjedhjet e lira dhe të ndershme janë prioriteti ynë. Ne duhet të bëjmë gjithçka, të konsultohemi me ekspertët më të mirë vendas dhe të huaj, në mënyrë që të ndërtojmë mekanizmat e duhur për të garantuar që vullneti i zgjedhësve të mos deformohet, si deri më sot, nga shitblerja e votës, bashkëpunimi me krimin dhe përdorimi administratës dhe fondeve publike.
Prioritet i yni është reforma territoriale. Grupi i punës së bashku me deputetët do të nisin një tur konsultimesh në të gjithë vendin, për një ndarje të drejtë administrative, për të fuqizuar pushtetin vendor dhe për të ofruar shërbime publike me cilësi të mirë.
PD ka qenë që prej ditës së parë, mbështetëse e reformës në drejtësi. Natyrisht ndërhyrjet e mazhorancës për ta vënë në shërbim të saj e kanë dëmtuar atë dhe pasojat po i shohim dhe sot. Pa një drejtësi të fortë, të pastër dhe të pavarur, Shqipëria nuk do të këtë progres ekonomik dhe as në rrugën drejt integrimit”, mësohet të ketë thënë Basha në mbledhje.
Pak para votimit në Kuvend për zgjatjen e afateve të Vettingut, Yuri Kim i ka bërë thirrje palëve politike të bëhen bashkë dhe të votojnë pro. Ambasadorja amerikane Yuri Kim në një reagim në rrjetet sociale, iu drejtua deputetëve të Kuvendit të Shqipërisë me një apel për të votuar zgjatjen e mandatit të organeve të Vettingut.
“Amendamenti për zgjatjen e Vettingut del sot para Kuvendit. Disa e kanë keqkuptuar ose keqinterpretuar atë si një çështje partiake ose një ‘hile’. Në fakt, është një vendim i rëndësishëm që kapërcen politikën e përditshme. Shpresojmë që deputetët të lënë mënjanë politikën dhe të votojnë për Shqipërinë në Bashkimin Europian. Ne jemi me ju”.
