Mbrëmjen e djeshme në emisionin “Open”, kryeministri Edi Rama ka bërë një parashikim për zgjedhjet e pjesshme lokale të 6 marsit. Ai ka thënë se në zgjedhje do të futet edhe presidenti Ilir Meta.
Sipas Kreut të Qeverisë, Kreu i Shtetit Ilir Meta do t’i bashkohet ish-kryeministrit Sali Berisha. Duke bërë batuta, Rama shtoi më tej se Berisha dhe Meta do t’u ofrojnë njerëzve varetë, “non-gratat”, ndërsa kryedemokrati Lulzim Basha, bravat. Mes këtyre alternativave, Rama tha se njerëzit do të zgjedhin kandidatët e tij, të cilët thotë se do t’i ketë normalë.
“Do bëj një parashikim, në zgjedhje do shkojmë me kandidatë normalë. Njerëz normalë që do të shkojnë të ofrojnë një kandidaturë për punë, përballë do të kenë brava, do të kenë vare. Dhe jam i bindur 100 për qind, 1000 mijë për qind që do të futet edhe Ilir Meta. Mbajeni mend tani që “non-grata” do të bashkohet me Ilir Metën, Ilir Meta është edhe grata edhe “non-grata” dhe do të jenë të dy bashkë atje, brava, qysqi, trasta të mbledhur atje.
Çfarë do zgjedhin njerëzit? Njerëzit duan të zgjedhin kryetar bashkie, këta do zgjedhin bravaxhintë, trastaxhinjtë dhe qysqixhinjtë. Ilir Metën e ke me Saliun, grata, “non-graten” i ke bashkë të dy sepse është ajo shprehja se ishim te xhamia; çfarë ndodh në fund me derën e xhamisë”, tha Rama.
