Gazetari Artan Hoxha ka paralajmëruar se do të ketë arrestime të tjera, lidhur me aferën korruptive të incineratorëve, që çoi në pranga ish-ministrin e Mjedisit, Lefter Koka. Duke folur në “ABC Live”, gazetari Artan Hoxha ka thënë se incineratorët janë denoncuar nga mediat që në vitin 2016, dhe nëse Prokuroria do hetonte, shqiptarëve do i kursehej një dëm prej 150 milion euro. Hoxha ka theksuar se SPAK e ka bërë të qartë se do të ketë arrestime të tjera. Çështja është se nëse SPAK do të vijojë me personat me detyrë nën Lefter Kokën apo që janë më lartë se ai.
Arrestimi i Leftër Kokës është goditja e parë e korrupsionit në nivel të lartë nga SPAK, dhe u lavdërua nga ambasada e SHBA-ve në Tiranë si tregues i suksesit të Reformës në Drejtësi. Kryetari i opozitës, Lulzim Basha akuzoi Edi Ramën, si përgjegjës final të aferës së incineratorëve.
Gjykata e Posaçme për Korrupsionin dhe Krimin e Organizuar vendosi të enjten të pranojë kërkesën e prokurorisë, për të vazhduar masën e sigurimit “arrest në burg” ndaj ish-Ministrit të Mjedisit, Lefter Koka. Ai u prangos të martën, në kuadër të hetimeve për koncesionin e incineratorit të Elbasanit.
Veç Kokës, SPAK kërkoi dhe arrestimin e shtetases Stela Gugallja, e cila është pronarja e kompanisë Albtek Energy si dhe Klodian Zotos, pronar i kompanisë Integrated Technology Services. Ata u shpallën në kërkim, pasi policia nuk arriti të gjejë vendndodhjen e tyre. Mbi të dyshuarit rëndojnë akuzat e “korrupsionit të zyrtarëve të lartë” dhe të “pastrimit të parave”.
Ja se çfarë tha Artan Hoxha
“A do ketë arrestime? SPAK e bënë të qartë këtë gjë. Përveç personave që është marrë masa e sigurisë. Nën hetim janë edhe persona që ka ndjekur procedurat. Ministri ka hedhur firmën në fund. Por janë komisione në ministri. Dhe problemi është se SPAK do hetojë këto poshtë apo do ngjitet më lart se Koka.
Me arrestimin e Kokës, është rasti i dytë dhe është më i rëndësishëm. Problemi është si do përkthehen në prova dhe fakte procedurat që janë bërë. Kemi akuza dhe mund të kemi, por problemi është si do provohen. SPAK ka të gjithë procedurën. Kryeministri nuk ka firmosur. Është një praktikë e tij. Edhe pse i ka promovuar. Dhe nuk ka pse SPAK të trembet. Në bazë të provave, ka edhe mbështetjen e mediave dhe trupit diplomatik.
Mund të japë mesazhe të forta. Pra, anëtarët e Komisionit për dhënien e koncesionit të incineratorëve. Në rastin e tenderit të uniformave, nuk u arrestuan lart por anëtarët e komisioneve në rastin konkret, përgatitet fakti se do arrestohen anëtarët e komisionit. Ata mund të lehtësohen duke dhënë emrat e të tjerëve. Kjo nuk fillon e mbaron me Lefter Kokën, Klodian Zoton e Stela Gugalljan”, tha Hoxha.
