Sot shënohen 31 vjet nga ngjarjet e dhjetorit 1990, që shënjuan për herë të parë tronditjen e regjimit komunist. Natën e 8 dhjetorit 1990, rreth 300 studentë nisën atë që më vonë u quajt Lëvizja Studentore ‘90. Të organizuar ata marshuan nga ‘Qyteti Studenti’ drejt qendrës së Tiranës. Me shprehjen “E duam Shqipërinë si gjithë Europa”, të rinjtë kërkuan ngritjen e sistemit të vlerave perëndimore dhe të shtetit të së drejtës; integrimin në Europë dhe garantimin e pluralizmit politik si bazë kryesore për një shoqëri të lirë e demokratike.
I pranishëm në “Qytet Studenti”, aty ku nisi Lëvizja Studentore, Kreu i Shtetit, Ilir Meta, tha se 8 Dhjetori është dita për të vlerësuar Azem Hajdarin dhe të gjithë studentët. Sipas tij, është koha që të rikthehet Shqipëria në shinat e vërteta të demokracisë. Në kuadër të Ditës së Rinisë, Meta nuk i shpëtoi pyetjeve të gazetarëve për atë ç’farë po ndodh brenda PD-së. Duke iu shmangur përgjigjes, Meta pohoi se e rëndësishme është që vendi të kthehet në shinat e duhura.
“Nuk jam këtu për t’u marrë me çështje të tilla. E rëndësishme është liria, demokracia, pluralizmi politik të kthehen në shinat e duhura, së bashku me të ardhmen europiane. Vota e lirë, gjthëpërfshirja mbeten vendimtare në këtë proces. Në fund fare, liri, demokraci. Jo më vonë por tani! (Meta përfundoi fjalën duke ngritur dy gishtat lart)
Yuri Kim: Të zgjedhim të ardhmen mbi të shkuarën
Ambasadorja e SHBA, Yuri Kim, me anë të një postimi në Twitter shkruan se SHBA do të mbështesin Shqipërinë në rrugën për të ecur përpara, teksa thekson se duhet zgjedhur e ardhmja mbi të shkuarën. “SHBA është ende me studentët e Shqipërisë në kërkesën tuaj për të qenë “si pjesa tjetër e Europës”. Ne jemi krenarë që jemi Aleati juaj i NATO-s dhe mbështetja në BE. Ne duam një Shqipëri më të drejtë, më të fortë, më të pasur. Le të vazhdojmë të punojmë së bashku për të ecur përpara dhe jo prapa, të zgjedhim të ardhmen mbi të shkuarën”, shkruan Kim.
8 Dhjetori, Basha: Dita që ndau të shkuarën nga e ardhmja
Kryedemokrati Lulzim Basha teksa përkujtoi 8 Dhjetorin ‘90, e konsideron atë si ditën që ndau të shkuarën nga e ardhmja, dhe që ndryshoi përgjithmonë historinë e Shqipërisë.
“8 Dhjetori 1990, është dita që ndau të shkuarën nga e ardhmja dhe ndryshoi përgjithmonë historinë e Shqipërisë. 31 vite më vonë, thirrja për Shqipërinë si gjithë Europa mbetet një kushtrim për të përmbushur amanetin e të rinjve dhe të rejave që sakrifikuan për liri e demokraci, si dhe për të mbajtur gjallë forcën, guximin dhe idealet e Dhjetorit ‘90, përballë një tjetër diktature, që po varfëron dhe largon bijtë dhe bijat e shqiptarëve, atë të korrupsionit. Gëzuar 8 Dhjetorin!”, shkruan Basha.
