Gazetari Artan Hoxha, ka zbuluar disa detaje që mund të hedhin dritë mbi atentatit e pak ditëve më parë kundër noteres në Tiranë. Mbrëmjen e së premtes, zona e “Komunës së Parisit” u trondit nga një shpërthim me eksploziv që kishte në shënjestër ish-noteren Rezarta Koçi. Makina ishte e parkuar në momentin që shpërtheu tritoli, dhe fatmirësisht nuk pati të lënduar. Gazetari Artan Hoxha, teksa ka qenë i ftuar në “ABC LIVE”, zbuloi edhe pistat në të cilat po hetohet.
“Ish-noterja ka marrë para me fajde, përveç kallëzimeve që janë bërë në adresë të saj. Ajo ka edhe një situatë tjetër. Një person shumë i afërt i saj që ka pasur lidhje, ka humbur jetën në Mamurras nga një aksident dhe sot ndodhet në situatën edhe për detyrimet që ka pasur personi në fjalë, diku 150 mijë euro, që personat që ia kanë dhënë me fajde, ia kanë katërfishuar, i kanë kërkuar 650 mijë euro.
Edhe fondacioni Xhaferri nuk e kalonte në këto nivele. Ish-noteres i është treguar se nuk mund të rrijë e qetë dhe se i ka mbaruar afati, dhe se janë në gjendje ti bëjnë keq asaj. Për ti treguar asaj, që ne nuk kemi frikë”, tha Hoxha.
Nisur nga shpërthimi, hetuesit vlerësojnë se sasia e eksplozivit ka qenë e vogël, e për pasojë dyshohet se ka qenë një formë paralajmërimi për noteren. Burime nga grupi hetimor bëjnë me dije se nisur nga problemet e noteres që ka pasur vitet e fundit, i ka përqëndruar hetimet tek konfliktet që ka pasur për çështje parash nga persona të ndryshëm. Zyrtarisht për mashtrim dhe përvetësim parash noterja është denoncuar në polici dhe prokurori në katër raste, ku në një rast është kallëzuar në vitin 2019.
Ndërsa 3 kallëzimet e tjera i ka në vitin 2021. Por sipas burimeve nga grupi hetimor mësohet se ka edhe persona te tjerë që kanë pasur konflikte për çështje parash me noteren Koçi, por që nuk i janë drejtuar autoriteteve për ta kallëzuar. Noteres Rezarta Koçi, në maj të këtij viti, iu hoq licensa përfundimisht nga Ministria e Drejtësisë, pasi një qytetar u ankua se noterja nuk kishte përdorur në mënyrë të rregullt llogaritë bankare.
