Analisti Frrok Çupi ka zbuluar skenarin që po përgatitet nga Sali Berisha, ku në lojë ka futur Jozefina Topallin dhe Bujar Nishanin. Ai parashikoi edhe përplasje me armë, dhe se kjo luftë në PD duket sikur sa ka filluar. Në studion e “Breaking”, ai foli për turet e Berishës, ndërsa e cilësoi si shqetësuese faktin se në krah të tij po shfaqen ato që kanë qenë si shtetarët e lartë, të njohur si kolona e sigurisë. Ai përmendi këtu mbështetjen që po i japin ish-presidenti Bujar Nishani dhe ish-kryeparlamentarja Jozefina Topalli.
“Kolona e sigurisë, është me Berishën. Mos kemi të bëjmë me një organizatë të lidhur me njëri-tjetrin? Mos harrojmë se SHBA ka interesa në Ballkan. Problemi është shumë i madh; kolona e shtetit, e sigurisë, si Nishani, Topalli, e këtu shqetësimi është se po destabilizohet Ballkani”, tha Çupi.
Ai e cilësoi si shumë shqetësuese situatën brenda PD-së, duke paralajmëruar përplasje të forta dhe nxjerr një skenar që mund të shkojë dhe armë brenda demokratëve. “Kemi të bëjmë me një luftë të madhe brenda PD-së. Kam frikë se mund të ketë një skenar për përplasje me armë”, theksoi Çupi. Ai gjithashtu deklaroi se PD-ja është si një parti e dhënë me qira nga Berisha, duke ia lënë drejtimin Bashës apo ndonjë tjetri, pra nuk ka një PD të demokratëve.
Pak më herët, në një intervistë për “A2 CNN”, ish-kryetarja e Kuvendit, Jozefina Topalli ka treguar se ka komunikuar me Sali Berishën, dhe ai nuk i ka kërkuar asnjëherë ndihmë, por ka dalë vetëm në një situatë të tillë.
“Kam komunikuar me z. Berisha, por z. Berisha nuk kërkon ndihmën e askujt. Ai i ka dalë përballë vetë situatës së tillë, ka kërkuar ndjesë. Është një komunikim krejt i njerëzishëm.
Ai kurrë nuk ka kërkuar ndihmë as në vitin 1997. S’është nevoja për të kërkuar ndihmë, në fund të fundit është hapur një proces që i shërben gjithkujt, vendit mbi të gjitha”, tha Topalli.
Edhe ish-presidenti Bujar Nishani ka dalë sërish në mbështetje të Sali Berishës, dhe nismës së tij për të takuar dhe bashkëbiseduar me demokratët në mbarë Shqipërinë. Ai ka bërë me dije në intervista të ndryshme se është bashkuar me “Foltoren” e Berishës, sepse beson në seriozitetin e kauzës së tij.
