Prej kohës së shpalljes “non grata” nga SHBA-ja, ish-kryeministri Berisha poston vazhdimisht fotografi ose video të vjetra, duke përçuar mesazhe kërcënuese. Ai është kthyer pas në kohë, teksa ka postuar një video nga Vlora, natën e 100 vjetorit të Pavarësisë, ndërsa shoqërohej nga qytetarët masivisht.
Me anë të kësaj videoje, Berisha i dërgon mesazhe indirekt kryedemokratit Basha dhe amerikanëve, se ai gëzon mbështetje të gjerë në Partinë Demokratike. Ish-kryeministri Berisha po i dërgon mesazh kryedemokratit Basha, duke frymëzuar turmat.
Kjo nuk është hera e parë që Berisha shfrytëzon çdo mundësi të sulmuar amerikanët. Ai përcillte mesazhin për SHBA-në se nuk tërhiqet para asgjëje, pasi është Sali Berisha.
“Jam Sali Berisha o budallenj, nuk tërhiqem unë, e dini si më dukeni mua, plehra më dukeni, se të tillë jeni, para interesit kombëtar nuk njoh askënd tjetër, s’njoh asgjë unë”, ka deklaruar Berisha nga foltorja e Kuvendit vite më parë.
Për shkak të ultimatumit të ambasadores së SHBA-së në Tiranë, Yuri Kim, ku tha se PD dhe Basha duhet të distancohen prej tij, duket se shtatori për Sali Berishën është kthyer në makth. Më herët, ambasadorja Yuri Kim ka kërkuar që Berisha t’i përkasë të shkuarës politike tashmë në raport me PD-në, duke nënkuptuar që të mos jetë pjesë e Parlamentit të ri, i cili pritet të fillojë në vjeshtë.
Ndodhur në këto kushte, Sali Berisha e ka të qartë se luftën me amerikanët e ka të humbur ende pa filluar. Për këtë arsye, po i drejton sulmet kundër Lulzim Bashës, për ta armiqësuar sa më shumë me bazën e PD-së.
Po ashtu ai ka sulmuar edhe ambasadoren Yuri Kim pas deklaratave të saj, se populli nuk duhet të hajë bar. Berisha tha se pasi Kim lavdëroi një masakër zgjedhore, nuk mund të vendosë kush do të hyjë në Parlament. “Ambasadorja Kim është unike në botë. Pasi ka lavdëruar një masakër zgjedhore, kërkon tani t’i diktojë këtij vendi se kush duhet dhe kush nuk duhet të futet në Parlament. Ajo qëndrimin e saj e lidhi me dogmën e barit jo rastësisht. Diktati dhe bari janë binom i paparë. Shqiptarët e dinë mirë që në diktaturë kur njerëzit për dramën e tyre i kishin deleguar Hoxhës, kanë ngrënë bar dhe kanë vdekur nga bari. Unë po bëj gjithçka që shqiptarët të mos hanë bar”, ka thënë ai.
TIRANA TODAY
