Gjolek Muhaj, babai i Alket Muhajt që i vra në shtator të vitit 2018, ka reaguar ashpër pas vendimit të Gjykatës së Apelit Gjirokastër, për të liruar të akuzuarit për ekzekutimin e të birit.
Për ”Report Tv”, ai u shpreh se se ky vendim i gjykatës ishte një vrasje e dytë për të, paralajmëroi se do të kryejë vetëgjyqësi dhe se do të kërcasë automatiku.
Sipas tij, pas këtij vendimi fshihet një korrupsion i madh, dhe se në dosjen për ekzekutimin e djalit të tij, ka probleme të mëdha.
“Kjo është një vrasje e dytë. Drejtësia në Shqipëri qoftë kjo që është. E zvarritën 33 muaj dhe arritën në këtë përfundim sot. Pse e lanë që të zgjatej kaq sa të shkeleshin afatet. Ç’kanë bërë këta. Këtu ka korrupsion të madh. Kush do t’i shihte kriminelët në mes të pyllit? Ka probleme të tjera që i di unë dhe janë të gjitha në dosje. Nëse gjykata nuk zbaton ligjin do të ketë vetëgjyqësi pastaj. E di unë se çdo të bëj pastaj. Mbase marrim vendim tjetër ne. Fillimisht do t’ia lë gjykatës. Por nëse nuk ka drejtësi unë do marr hakun e djalit. Ma vranë kriminelët djalin e vetëm. Edhe unë gjej armë, njerëz kam sa të duash. Këta duan të kërcasë automatiku si batalion”, tha ai.
Gjykata e Apelit ka liruar nga burgu babë e bir, Et’hem dhe Dino Muhaj, pasi ishin arrestuar në 8 shtator 2018. Ata u arrestuan dhe akuzuan si vrasësit e Alket Muhajt në fshatin Rabije në Memaliaj.
Apeli konstatoi se pretendimet e palës mbrojtëse bazoheshin në ligj dhe ka dhënë vendimin për lirimin e tyre pas 2.5 vitesh burg.
