Kandidati i vetëshpallur për kryetar i Partisë Demokratike, Fatbardh Kadilli ka kërkuar largimin nga PD-ja të ish-kryeministrit Sali Berisha, pas shpalljes ‘’non grata’’ nga Departamenti Amerikan i Shtetit.
Sipas Kadillit, Berisha i ka të gjitha mundësitë, synimet dhe etikën që të mbrohet dhe ta sqarojë këtë çështje privatisht.
Kadilli shprehet se Berisha do e shmangë Partinë Demorkatike nga kjo çështje, duke e bërë këtë betejë nën emrin e tij.
Postimi i Kadillit në rrjetin social, Facebook
Lajmi i shpalljes së z. Berisha persona non grata nga Sekretari i Shtetit, ka provokuar shumë emocione, sidomos mes mbështetësve dhe atyre që kanë rrugëtuar në politikë krah tij.
Në 30 vjetorin e vendosjes se marrdhënieve diplomatike me Shtetet e Bashkuara, ky vendim sjell shqetësim për të gjithë. Kujtoj ende imazhet e drejtuesve demokratë Berisha dhe Pashko, si të ftuar specialë të këtij momenti historik.
Sot, në një situate krejtësisht të përmbysur, Berisha i ka të gjitha mundësitë, synimet dhe etikën të mbrohet dhe ta sqarojë këtë çeshtje privatisht.
Kam bindjen se ai do e shmangë PD nga përfshirja në këtë çështje të së djeshmes duke e marrë nën emrin e vet betejën finale për emrin dhe historinë.
Partia Demokratike, si partia e atyre që formuluan idetë politike dhe u frymëzuan nga zëri dhe ethosi amerikan, do të jetë dhe duhet të jetë e qartë në qëndrimin ndaj vlerave të lirisë dhe demokracisë, dhe nuk do t’i kompromentojë në asnjë rast marrdhëniet me partnerin strategjik dhe mikun më të madh të Shqipërisë.
Lajmi për shpalljen ”non grata”, u dha nga Sekretari Amerikan i Shtetit, Antony Blinken ditën e djeshme, i cili njoftoi zyrtarisht se Berisha ka minuar demokracinë, dhe se gjatë ushtrimit të detyrës së kryeministrit, është përfshirë në afera korruptive.
Në faqen zyrtare, DASH ka publikuar vendimin e plotë, ku thuhet se Berisha ka qenë i përfshirë në veprime korruptive për shpërdorim të fondeve publike, dhe ndërhyrje në proceset publike duke përdorur pushtetin.
Në vendimin e tij, Blinken ka përcaktuar si të papërshtatshëm edhe bashkëshorten e ish-kryeministrit Liri Berisha, djalin Shkëlzen Berisha dhe vajzën Argita Berisha Malltezi.
I menjëhershëm ka qenë reagimi i Berishës, i icili tha se në 30 vite karrierë politike nuk ka pasur asnjë akuzë për kurropsion ndaj tij, dhe ftoi Blinken që të paraqesë çdo fakt apo dokument që disponon. Pasditen e sotme në orën 18:00, Berisha do të ketë një deklaratë për mediat, ku do të reagojë zyrtarisht në lidhje me këtë vendim të marrë ndaj tij.
