Një tjetër denoncim për abuzim seksual, i është shtuar listës së zezë të policisë. Pasi vendi u trondit dje nga përdhunimi i 15-vjeçares në Mirditë, ku kishin abuzuar me të pesë persona, rasti i radhës është raportuar nga policia e Beratit. Në pranga ka rënë një 55 vjeçar me inicialet A.Ç , pasi dyshohet se ka ngacmuar seksualisht një të mitur.
“Nga specialistët e Seksionit për Krimet, u bë arrestimi i shtetasit A.Ç., 55 vjeç, banues në Kutalli, pasi ka bërë kallëzim një shtetase 13-vjeçare, se ky shtetas e ka ngacmuar seksualisht”, njofton policia. Materialet i kaluan Prokurorisë së Rrethit Gjyqësor Berat, për veprën penale “Ngacmim seksual”. Është tejet shqetësuese, ku të miturat abuzohen, dhe kanë frikë që të denoncojnë në polici, për rrethana të ndryshme.
15-vjeçarja e cila denoncoi dje në polici për përdhunimin nga 5 persona, kishte frikë që të shkonte me herët në rajonin e policisë. Kjo pasi abuzuesit, kishin përdorur taktikën e shantazhit, për të abuzuar me 15-vjeçaren, identiteti i së cilës nuk bëhet me dije.
