Pronari i një servisi në kryeqytet ka dhënë dëshminë e tij në lidhje me ngjarje e rëndë të ndodhur 5 ditë më pare në zonën e ”5 Majit’’, ku mbeti i vrarë 27-vjeçari, Mehmet Qama.
Ai u shpreh para grupit hetimor se është lajmëruar nga një person për vrasjen e ndodhur, dhe ka shkuar në lokalin ku u vra i riu Qama.
Ndër të tjera, ai tha se ka parë autorin e krimit, Marjus Demën që të shtrihej në tokë duke qarë.
“Më mori dikush në telefon dhe më tha ‘plasi arma tek “shtëpia e bardhë”’. Sapo kisha dalë dhe pashë disa djem që largoheshin në drejtime të ndryshme. Marjusi ishte shtrirë dhe po qante e bërtiste po fliste përcart, fillimisht mendova mos ishte plagosur ky. E kishte kapur në krahë por fliste përçart “O çfarë bëra, më vdektë goca” dhe fliste në telefon. Kishin dalë dhe banorë të lagjes pasi ishte krijuar një situatë alarmante.”, tha pronari i servisit.
Ngjarja e rëndë ndodhi mbrëmjen e 10 majit, në lokalin e viktimës, ku së bashku me autorin dhe disa miq të tjerë, po kunsomonin lëndë narkotike dhe pije alkoolike.
Autori i krimit, Marjus Dema po luante me një pistoletë, dhe më pas qëlloi për vdekje mikun e tij, Mehmet Qamën.
Ditën e sotme, autori dhe 4 të tjerët që ndodheshin në lokal në momentin e vrasjes, do të dalin para gjykatës, ku do të njihen me masat e sigurisë në drejtim të tyre.
