Nga: Ivan Pereira “ABC News”
Shtetet në të gjithë SHBA-në po raportojnë një numër të madh njerëzish që marrin dozat e tyre të vaksinës kundër koronavirusit, dhe sipas Qendrave të SHBA-së për Kontrollin dhe Parandalimin e Sëmundjeve (CDC), gati 95 milion doza janë administruar vetëm gjatë muajit të fundit.
E megjithatë, pavarësisht kësaj numri i rasteve të reja me Covid-19 në Shtetet e Bashkuara nuk ka pësuar ndonjë rënie dramatike. Përkundrazi, për momentin ka një mesatare 7-ditore që i kalon rreth 60.000 raste në ditë, po sipas të dhënave të CDC.
Por dr.Xhon Braunshtein, epidemiolog në Spitalin e Fëmijëve të Bostonit dhe një kontribues i ABC News, tha se nuk ka asnjë arsye të menjëhershme për t’u alarmuar, pasi vendi ka ende mënyra për të ecur përpara, para se sa të shohim një ndikim më të madh nga vetë vaksinat anti-Covid.
“Ne do të arrijmë edhe në atë moment. Ajo që është e rëndësishme dhe nuk duhet harruar, është se ne kemi një nivel të lartë të mbulimit me vaksinat anti-Covid, dhe do të ketë një farë niveli të ndryshueshmërisë së situatës në pjesë të ndryshme të vendit”-theksoi Braunshtein.
Eksperti gjithashtu theksoi se disa shtete po përjetojnë rënie të numrit të rasteve të reja me Covid-19. Por disa prej tyre si Miçigani dhe Pensilvania po tregojnë rritje, duke ndikuar kësisoj edhe tek të dhënat e përgjithshme kombëtare.
Ai theksoi se pas këtyre rasteve të reja ekzistojnë një numër faktorësh, duke përfshirë variantet e reja që janë më të transmetueshme. Kështu, sipas të dhënave zyrtare të CDC-së, gati 60 për qind e rasteve të reja me Covid-19 në Miçigan i përkasin variantit B 117 që u zbulua në fillim në Mbretërinë e Bashkuar.
Deri më tani, studimet kanë treguar se vaksinat e ARN-së, janë efektive kundër të gjitha varianteve të njohura, përfshirë B117. Braunshtein vuri në dukje se të dhënat më të fundit kanë treguar një rënie të vogël të rasteve, me mesataren 7-ditore që ka rënë nën 54.000 të shtunën.
“Ne nuk kemi një rënie të madhe, në krahasim me rritjen e numrit të të vaksinuarve, por ajo është sërish shumë më poshtë se sa mesatarja prej 60.000 rastesh në ditë, që kemi pasur disa javë më parë”- thotë ai.
Edhe pse SHBA ka autorizuar vaksinimin e cilitdo që dëshiron mbi moshën 16 vjeç, Braunshtein vuri në dukje se janë ende dhjetëra miliona amerikanë që nuk e kanë marrë dozën e tyre, dhe se prirja do të ndryshojë teksa më shumë njerëz do të marrin vaksinën kundër Covid-19.
Deri të hënën,më shumë se 140 milion njerëz, apo afro 42.5 për qind e popullsisë amerikane, kishte marrë të paktën një dozë vaksine, ndërsa më shumë se 95 milion njerëz, apo afërsisht 29 për qind e popullsisë totale, janë vaksinuar plotësisht.
“Në Izrael, rastet nisën që të binin ndjeshëm kur ishte vaksinuar plotësisht mbi 45 për qind e popullsisë”- thekson Braunstein. Doktori thekson se pacientët që nuk janë regjistruar për tu vaksinuar, duhet ta bëjnë këtë sa më shpejt që të jetë e mundur, në mënyrë që rastet e reja të bien akoma më shumë, dhe që amerikanët të jenë më të mbrojtur nga variantet e reja të koronavirusit.
Ai rekomandoi që edhe ata që ende janë në pritje për të marrë vaksinën e tyre t’i përmbahen udhëzimeve shëndetësore duke ruajtur distancën sociale, duke shmangur turmat e mëdha në ambiente të mbyllua dhe të mbajnë maska.
“Ndërsa mund të jetë tunduese të thuash:Edhe pse nuk jam vaksinuar, mund të përfitoj në të njëjtën mënyrë si të tjerët që janë vaksinuar, kjo nuk është e vërtetë. Ne nuk mund t’i ndryshojmë dot gjërat derisa të vaksinohen të gjithë plotësisht”- theksoi ai.
Burimi i lajmit: https://abcnews.go.com/Health/covid-19-cases-sharp-drop-spike-vaccinations/story?id=77323148
Përshtatur nga TIRANA TODAY
